рав Авром Шмулевич (avrom) wrote,
рав Авром Шмулевич
avrom

Category:

Начинающий аварский писатель Авраам Шмулевич: " ЦIалги гургаги. ЦIияб соналъ - цIияб политика"

В дагестанский газете "Миллит", №1 от 11 января 2013г., вышло мое интервью на аварском языке" ЦIалги гургаги. ЦIияб соналъ - цIияб политика". что значит: "Кнут и пряник. В новом году - новая политика".

ЦIалги гургаги

12.01.13 15:23 Рамазан Ражабов
E-mailПечатьPDF

 

ЦIияб соналъ - цIияб политика


Россиялъул пачалихъалъ Шималияб Кавказалда гьабулеб политикаялъул цIияб тIамач бегун бугилан рикIкIунеб буго "Политикиял харбал" абураб информационнияб сайталда бахъараб макъалаялда Авраам Шмулевич абурав авторас. Гьесул баяназда рекъон, араб соналъул ахиралдаго Кремлиялъ хIукму гьабун буго цIияб сон цIияб политикаялдасан байбихьизе.


Сочиялъул олимпиялъул хIаязда цересел политикиял хIаял


shmulevichКавказалда бугеб политикиябгун социалияб ахIвал-хIалалъ бихьизабулеб буго федералияб тIалъиялъул Кавказалда бугеб нухмалъиялъулаб модель пайда дагьаб ва хIасил гьечIеб бугилан. ТIасияб соналъ Сочиялда Олимпиялъул хIаял тIоритIилалде Кавказалда киналго политикиял проблемаял лъугIизаризе кколилан рикIкIунеб буго рехсарав авторас.

ЦIияб политика билълъанхъизабулаго, аслияб къагIидаялъ хиса-басиял гьаризе руго бищунго хIалуцараб ахIвал-хIал бугебин рикIкIунеб Дагъистаналдаян рикIкIунеб буго "Кавказская политика" абураб сайталда политолог Куашев Тимурица. Гьес рикIкIунеб буго аслияб къагIидаялъ цIияб политика хIалтIизабизе бугин бакIалъулаб политикияб элитаялдехун.

Цо-цо политикиял къуватал гIарац кьун гIодор руссинаризе руго, цогидал къуваталдалъун политикияб аренаялдаса рикIкIад гьаризе руго, гьелъул хIасилалда киналго Кремлялъул кверщаликье рачине руго. Изну гьечIого яргъид гIуцIаразулгун унеб хIалуцараб дандечIеялъулъги хиса-басиял рукIине ругилан рикIкIунеб буго экспертаз.

Политикиял гIелмабазул кандидат МухIамадбегов ХIасанбегилпикруялда рекъон, Шималияб Кавказалда унеб рагъулаб дандечIеялъулъ гIицIго къуват хIалтIизабиялъ хIасил кьолеб гьечIолъи ахир-хъадги бичIчIулеб буго Москваялда ва гьабсагIаталда аслияб къагIидаялъ хIалтIизабизе буго политикияб пропаганда.

«Дагьалниги ракълиде руссине бокьарал салафиязул къокъаби цереккун кьварараб идеологияб ва политикияб тIадецуялде гъоркье кколел рукIун ратани, гьабсагIаталда гьезие ихтияр кьезе буго рагьун жидерго идеология тIибитIизабизе, амма кидаго пачалихъалъ халкквезе буго гьезда хадуб», - абун хъвалеб буго гьес жиндирго макъалаялда «Public Post» сайталда.

Политологасул пикруялда рекъон, гьединаб политикаялъ хIасил кьечIони, Кремлялъ байбихьизе буго нахъойги ва жеги цIикIкIун къуват хIалтIизабизе, амма гьеб букIине буго 2014 соналъ Сочиялда Олимпиялъул хIаял лъугIун хадуб, гьабсагIаталда ахIвал-хIал хIалуцинабизе бокьун гьечIо федералияб тIалъиялъе.


«ГIурус прокурорас квешлъи квегъичIо»


Кавказалъулгун федералияб тIалъиялъул гьоркьорлъаби киданиги рукIалиде ккезе гьечIо, жиндир заманалда Кавказалъул республикабазда тIалъиялде рачIарал криминалиял ва тухумчилъиялъулал къокъаби политикаялдаса рикIкIад гьаричIониян рикIкIунеб буго тарихиял гIелмабазул кандидат, политолог Нугъаев МухIамадица. Гьесул пикруялда рекъон, гьанир кигIан гIемер батIи-батIиял политикал хIалтIизе ритIаниги, бакIалъулаб тIалъи бацIцIад гьабичIого жо кколаро.

Нугъаев МухIамад: «Москваялдаса цIиял чагIи гьанире хIалтIизе ритIиялъ ялъуни кигIан гIемер президентал гьанир хисаниги, гьелъ хIасил кьеларо. Щайгурелъул, гьединал чагIи гьанжелъагIанги гIемер ритIулел рукIана гьанире, амма щибниги хисичIо.

Мисалалъе босани, Дагъистаналда республикаялъул прокурор вуго нилъеда жаниса чи гурев, Москваялдаса витIун вачIарав гIурусав, ялъуни восе Шималияб Кавказалъе нухмалъи гьабизе витIун вачIарав Хлопонин. Щиб гьезда хисизабизе кIвараб? Щибниги кIвечIо.

Гьелеха чIагоял мисалал. Москваялъ гьанжелъагIан гьаниб гьабулеб букIараб политикаялъул загIиплъи. Гьениса къуваталъул идарабазе нухмалъи гьабизе чагIи ритIунилан гьаниб гьезда хIалтIун бажарулеб гьечIо. ЧIванкъотIун щиб гьабизе кколебин абун гьикъани, дица абилаан, тIоцебе къуват хIалтIизабизе кколин.

Кидаго гуро къуват хIалтIизабизе бегьулеб. ГьабсагIаталда буго гьединаб ахIвал-хIал. Къуват хIалтIизабизе ккола, тIадегIанал кабинетаздаса байбихьун. ТIоцебесеб иргаялда, тIалъиялда бугеб криминал нахъе гьабизе ккола. Гьеб гьабизе ккани, къуват хIалтIизабичIого рес гьечIо.

Ле гьудул, мун нахъе а, дуца хIалтIи хвезабулеб бугилан абун, гьел нахъе унаро ва гьединлъидал чара гьечIеб жо буго федералияб тIалъиялъ къуват хIалтIизаби».

 

Яргъил мацIги триллионалги


Кремлялъулгун «хIалтIул» гьоркьорлъаби гьаризе кIвечIел диниял церехъабиги нахъегIан къазаризе руго ва ракълиде рачIине бокьичIел киназдехунго кьварараб къуват хIалтIизабизе бугилан рикIкIунеб буго политолог Куашев Тимурица.

Гьесул баяназда рекъон, федералияб тIалъиялъ Кавказалда гьабулеб политикаялъулъ хIалтIизабизе буго къуват ва бакI-бакIазда финансазулаб политика.

2012 соналъул 13абилеб декабралда Россиялъул ХIукуматалъ тасдикъ гьабун буго «2025 соналде щвезегIан Шималияб Кавказ цебетIезабиялъул пачалихъияб программа». Гьеб программаялда рекъон, Шималияб Кавказалъе биччазе буго федералияб бюджеталдаса 2,5 триллион гъурущ.

«Гьеб гIарцул кумекалдалъун мукIур гьаризе руго Кавказалда ахIвал-хIал хIалуцинабулел хасал политикиял къуватал. МукIурлъичIездехун нахъеги къуват хIалтIизабизе буго», - абун бицана Куашев Тимурица «Миллаталъул» мухбирасе.

Журналист Авраам Шмулевичас критика гьабулеб буго гьединаб Москваялъул политикаялъе. Гьесул пикруялда рекъон, гьеб политикаялъ, Кавказалдагун Москваялда гьоркьор гIадатиял гурел гьоркьорлъаби гIуцIи гуреб, жибго Кавказалда ругел халкъазда гьоркьоб хIалуцин бижизабулеб буго, цоязе гIемераб гIарац биччан, цогидаздехун къуват хIалтIизабун.

ГIарац биччай ва аскариял реххи гурони, тIокIаб батIияб политика федералияб тIалъиялда лъалеб гьечIилан бицунеб буго гьес жиндирго макъалаялда. Кавказалъул халкъазулгун Москваялъул цIиял, батIиял гьоркьорлъаби гIуцIизе кколин рикIкIунеб буго киназдего гIагарун политологаз ва Шималияб Кавказалъул экспертаз.

Чанго соналъ цебе «Южный репортер» абураб газеталъулгун гьабураб гара-ч1вариялда добе мехалъ вук1арав Дагъистаналъул президент Мух1у Г1алиевас бицун бук1ана гьадин: «Кавказ Москваялъ киданиги кваназабизе ккелароан, Кавказалда ругел т1абиг1иял бечелъаби х1алт1изаризе рес кьуни бак1алъулал республикабазе. Мисалалъе, Каспий ралъдал раг1алда бугеб Дагъистаналъе кинабг1аги пайда гьеч1о ралъдадаса, кинабго буго федералиял идарабазул кверщаликь. Гьанисан Москваялдеги босун, добасан жидеего бокьахъе бикьа-къот1улеб буго».

Балагьараб мехалъ, лъица щал кваназарулел ругел абураб суалалда т1адги жеги ургъизе кколел руго.



Tags: Аварский язык, Дагестан, Мои интервью, Мои тексты, Российская политика на Кавказе
Subscribe

Recent Posts from This Journal

  • Post a new comment

    Error

    default userpic

    Your IP address will be recorded 

    When you submit the form an invisible reCAPTCHA check will be performed.
    You must follow the Privacy Policy and Google Terms of use.
  • 11 comments

Recent Posts from This Journal